Spiriteco kaj medicino kune por kuracado de mensaj malsanoj
Severaj depresio kaj anksio estas pli kaj pli ofte diagnozitaj lastatempe, same kiel psikozaj statoj rilate al humoro kaj personeco, kaj tio alportas grandan zorgemon. Laŭ datumoj de la Monda Organizo pri Sano (MOS), je la 23-a de Februaro 2017, ĉirkaŭ 322 milionoj da homoj en la mondo estas trafitaj de depresio, kio respondas al 4,4% el la monda loĝantaro. Tiu kvanto kreskis je 18,4% inter la jaroj 2005 kaj 2015. MOS kalkulas, ke en 2020 tiuj malsanoj estos la plej ofta kaŭzo de neĉeesto en laboro.
Eĉ se parto el tiuj kazoj eble estas katalogita malprecize kiel perturbiĝoj — ĉar ni komprenas, ke ekzistas ankaŭ aro da naturaj manifestiĝoj de ia spirita sentemo, kiu postulas specifan ekvilibrigon kaj orientadon —, tamen oni rimarkas, ke tiu temo estas vere inda je pli atenta konsidero, flanke de la socio, zorge kaj sen ia ajn antaŭjuĝo.
Cetere, ankoraŭ restas multaj aspektoj, por esti komprenataj, se oni parolas pri la spirito kaj pri la materio. Sekve, oni ne hontu aŭ timu tiaspecajn diagnozojn. Male. Necesas rigardi ilin serene kaj kun Realiganta Fido, por alfronti kaj transpasi ĉian malfavoran klinikan aspekton, ĉiam kalkulante je la nemalhavebla subteno de Dio, de la Kristo kaj de la Sankta Spirito. Mi kutimas aserti, ke la homa organismo estas la plej eksterordinara maŝino en la mondo. Tamen, ankaŭ ĝi foje misfunkcias. Sed kune kun Frata Amo, eĉ medikamentoj donas pli bonajn rezultojn. (...)
Pari passu kun publikaj politikoj kaj kun medicinaj, psikiatriaj kaj psikologiaj zorgoj pri la pacientoj, oni ne rajtas flankenlasi, en dialogado inter familianoj kaj en komunumoj, la bezonatan socian subtenon kaj la nemalhaveblan ĉeeston de Ekumena Spiriteco. Estas nepre necese klarigi al la ĉirkaŭantoj la gravecon serioze sekvi la preskribitan kuracadon per medikamentoj kaj psikoterapio, ĉar ja Jesuo, la Ĉiela Miraklofaranto, certigas al ni: “Per via pacienco vi akiros viajn Animojn” (Evangelio laŭ Luko, 21:19).
La Spirita Mondo ne estas ia abstraktaĵo. Ĝi estas (ankoraŭ) nevidebla, sed ĝi ekzistas. Ni ne malhavu ĝian valoran kontribuon al nia korpa plibonigo, kiu komenciĝas je spirita sano.
La komentoj ne reprezentas la opinion de ĉi tiu retejo; ili estas sub ekskluziva respondeco de ties aŭtoroj. Ne estas permesata la enmeto de netaŭga materialo, kiu malrespektas la etikon kaj bonmorojn kaj/aŭ la rajtojn de aliuloj. Konu plie ĉe Oftaj demandoj.
Croatia
Bulgaria
Australia
Poland